'A cchiù bella d''e stelle

Quanno ride 'a cchiù bella d''e stelle,

quanno siente 'e guagliune 'e sparà,

quanno siente 'e sunà 'e cciaramelle,

è Natale che dice: <<Sto cca>>.

           Già so' mmorte tutt''e ffronne,

           sott'all'acqua o sott''a neve,

           'ncielo 'o Sole s'annasconne:

           sente friddo, tene 'a freve.

Qualche auciello sulamente,

pe' spassarse 'a fantasia,

canta... e pare 'e stà cuntento,

pure senza cumpagnia.

           Che tristezza quanno chiove,

           quanno scjocca o tira 'o viento!

           Vierno dice: <<Malanova,

           malanova p''e pezziente!>>

<<Ma nun 'mporta, dice 'a gente,

nuje vulimmo 'a tummulella,

sulo chesto, nun fa niente:

duje pignuole, ddoje nucelle,

           quatto anguille e 'o bicchieriello.

           'Nfaccia ô ffuoco (che resate!)

           ce cuntammo 'e fattarielle...

           . e accussė passa 'a nuttata.

Chillu bellu Bambeniello

janco e rrusso, tunno tunno,

che ajutasse 'e puverielle

e accuitasse a tutt''o munno>>.

Anonimo